曾鈺成：郵輪碼頭毋須奢華

【明報專訊】立法會主席曾鈺成趁8月尾立會休會時同太太坐郵輪去北歐，沿波羅的海去俄羅斯、丹麥、挪威等地，平日會暈船浪嘅曾主席話今次由於行內海，所以無問題，仲拆解其實坐郵輪絕對唔係「豪遊」，佢今次旅程去足11日，只係用咗萬幾蚊，相信自己去一定搞唔掂，但如果參加各地嘅當地團，就可以好貴喇。


坐郵輪玩11日 只花萬多元

曾主席話，唔係度度都要參加旅行團，但例如喺俄羅斯聖彼德堡，因為要去睇博物館，都係跟團較划算，其他地方自己玩就得。曾主席今次去咗多個地方，話覺得無一個地方嘅郵輪碼頭比香港靚，直言香港整個咁靚嘅郵輪碼頭「會唔會浪費呢」，其他地方嘅碼頭都似爛地，遊客一登岸就會上旅遊巴，唔會留喺碼頭，所以碼頭根本唔需要咁奢華。


曾主席話碼頭最重要係接駁交通方便，佢話遇到一對南非遊客就盛讚嚟香港時，喺尖沙嘴海運大廈上岸，一落船就可以即刻玩；亦有旅客同佢呻試過喺貨櫃碼頭附近上船，好唔方便。雖然有咁多體會，但曾主席話未有機會見到黨友、商務及經濟發展局長蘇錦樑，向對方提出喎。