卿姐再爭財會主席

【明報專訊】泛民噚日開飯盒會，傾立法會新一年各事務委員會主席副主席人選安排，民主黨主席劉慧卿將再戰財委會主席。卿姐過往曾兩度爆冷擊敗建制派當選財委會主席，不過，當時對手係中總黃宜弘，今次則係接替現任主席張宇人嘅金融界吳亮星，卿姐能否再做主席，大家拭目以待。


郭榮鏗挑戰梁美芬

另外，公民黨法律界議員郭榮鏗亦爭取做司法及法律事務委員會主席，對手會繼續係經民聯梁美芬。不過，喺建制派人數佔優下，若佢哋一致撐梁美芬，郭榮鏗要勝出機會都幾微。


至於資訊科技及廣播事務委員會主席，泛民同建制派一早協調各做主席兩年，今年會期繼續由泛民連任。飯盒會決定派出資訊科技界莫乃光出選，但莫能否當選，要睇現任主席黃毓民會唔會爭取連任。莫乃光同Emily講，佢做議員一年，唔係新丁，可以應付主席工作，仲會向建制派拉票。