財爺倡啟德擺酒搞展覽

【明報專訊】啟德郵輪碼頭一年得幾個月有郵輪泊岸，咁靚嘅場地丟空會好浪費，財爺曾俊華喺網誌就話幫碼頭搵商機。佢話碼頭大堂採用無柱設計，適合舉行各種展覽及大型活動，如舉辦約100圍嘅千人宴，同埋婚宴。佢仲話，市民同旅客可以喺碼頭嘅天台花園舉行婚禮，喺斜陽夕照下同另一半訂下愛的盟約，婚宴後，一對新人可登上郵輪展開蜜月之旅，仲問大家覺唔覺得佢條橋好正？


建議與九龍城食肆創「美食之城」

財爺早前去咗參觀碼頭，佢話參觀當日，碼頭正在籌備利用行李大堂同碼頭前沿區平台嘅地方舉行汽車展覽。佢話家有多個團體正同碼頭公司洽談利用場地搞活動，認為碼頭嘅兩個乘客等候大堂寬56米，每個面積達3000平方米，加上其他設施，可以發揮多重功能，補充一下目前市區較為緊張嘅會議展覽空間。


財爺又話，九龍城一帶食肆，可以諗吓同碼頭合力建造一個形象鮮明嘅「美食之城」品牌，吸引旅客喺晚上返去郵輪前，先喺九龍城食餐飯或消夜，否則旅客可能會去其他地方玩。佢又話碼頭同商戶可以向「蘭桂坊之父」盛智文取經，因為當年推廣蘭桂坊嘅經驗，就係與同區業界聯手搞「蘭桂坊」品牌，然後統一對外宣傳。