梁振英火速反駁 莫乃光感謝錯愛

【明報專訊】資訊科技界立法會議員莫乃光（Charles），噚日早上8點幾喺電台節目批評特首梁振英（CY）無實踐競選承諾，成立科技及通訊局。此話一出，特首辦已經喺朝早11時46分出聲明反駁，話特首一直都希望成立科技及通訊局，搞唔成係因為上屆立法會「拉布」，搞到無得架構重組。特首辦周日突然咁高效率，Charles都話要多謝特首「錯愛」，但佢話無興趣同任何人「鬥嘴」。


批未成立科技局 CY話因為「拉布」

Charles噚日喺港台《給香港的信》度話，早前去韓國考察，知道佢哋會成立國家IT業促進局，協助科技發展。Charles話港府曾經承諾會成立科技及通訊局，批評CY未有兌現承諾。之後特首辦火速回應，話如果再次推動架構重組方案，就可能會出現上屆立法會拖拉嘅情况。


莫乃光其後回應話，CY應聽清楚佢講乜嘢，指CY將上屆立法會反對整個政府總部架構重組，同今屆立法會主要政黨普遍支持成立科技局兩件事混為一談，叫CY順應科技界、學術界以及主要政黨要求，盡快成立科技局。