夢熊去社民連晚宴 舉報者話無尷尬

【明報專訊】社民連噚日舉行成立7周年誌慶暨籌款晚宴，泛民同學民思潮都係座上客，但最特別嘅嘉賓可以話係前全國政協委員劉夢熊。Emily奇怪點解夢熊會現身社民連晚宴，副主席吳文遠就話夢熊一直都有支持阿牛曾健成嘅保釣運動。Emily記得年初社民連根據劉夢熊喺《陽光時務週刊》嘅訪問內容，向廉署正式投訴懷疑佢涉賄選，但吳文遠話大家見面無尷尬，仲讚夢熊伸張正義指證梁振英。


學民銷公民提名 夢熊舉V合照

學民思潮成員都趁機同夢熊講，希望佢可以支持公民提名產生2017年特首候選人，不過，學民發言人黎汶洛話夢熊無回應，只係舉起V字手勢同大家合照。夢熊喺台上發言時，都有講支持特首普選可以畀泛民入閘，話唔應該對泛民有敵對嘅意思。主席梁國雄（長毛）致辭時都不忘呼籲大家參與佔中，「不見不散」。


吳文遠話今年筵開55席，志在同街坊朋友食餐飯見吓面，立法會議員謝偉俊同白姐姐一齊捧場，西貢區議員方國珊都有出席。長毛仲捐出一件「64」號波衫，另一立會議員毛孟靜打算用1萬蚊買咗佢，點知有個長毛支持者出2萬，睇嚟佢件波衫都幾受歡迎。