馮康月中退休準備半馬

【明報專訊】新界東醫院聯網行政總監馮康今個月18日就退休，噚日佢主持任內最後一個記者會，公布今年度聯網工作計劃，但大家最關心佢退休後嘅去向，馮醫生神秘地拒絕披露詳情，但就話之後仲有好多機會同大家見面。馮醫生擅長拉二胡，威院同事同一眾記者行家就送咗一幅馮醫生拉二胡嘅肖像畫，畫得似模似樣㗎。


一向鍾意跑馬拉松嘅馮康話，退休後首要任務係練跑，因為會參加明年2月嘅渣打馬拉松，佢話平日工作忙，冇時間跑步，所以家係最佳時機好好鍛煉，但因為體力不如以往，所以只能挑戰半馬。


至於近日捲入威爾斯醫院心臟科前主管余卓文被「封刀」一事，馮醫生就對所有提問三緘其口，無論問佢調查進展，甚至擔唔擔心事件成為自己任內污點，佢一律唔回應，以「事件已進入調查階段」為由耍手擰頭。