發叔從政因岳飛？

【明報專訊】經民聯都要搞軟銷工程，喺網站幫立法會議員、新界鄉議局主席劉皇發做咗個人物訪問，訪問固然少不免要歌功頌德一番，但都有啲Emily冇聽過嘅故事，就係發叔從政嘅原因，係因為細個時阿媽同佢講岳飛精忠報國嘅故事，話要「待人以忠、對事以誠」，又鼓勵佢投入公務，所以佢就喺24歲做咗龍鼓灘村村長，今日成為鄉議局主席嘞。


指不時做說客「拆彈」

發叔話自己不時要做「魯仲連」說客角色，幫手「拆彈」，好似錦綉花園大道使用權糾紛、菜園村買路權糾紛等，仲話要訣係笑口常開，因為「拳頭不打笑臉人」。發叔仲話自己出錢幫手移除障礙，內心會滿足，「如果一個人富可敵國，但每日有幾名保鑣跟住自己，內心怎會安樂？」唔知發叔呢句有冇影射邊個富豪？


發叔2004年開始每年代替民政事務局長喺車公廟求籤，佢話自己十分認真對待求籤，事前必定齋戒沐浴，以表誠心。佢話求籤娛樂性高，大家都係當睇熱鬧。發叔求得籤多，識得用車公嚟擋駕，經民聯嘅人問佢係咪當日幫菜園村村民買路權嘅善長，佢就答話﹕「要問車公，哈哈。」