籌款風波 方國珊今舌戰區會

【明報專訊】近排有睇過日劇《半澤直樹》嘅朋友，對男主角被內部處分時舌戰反擊一幕一定印象深刻；今日西貢區議會會議室都會出現一人舌戰多人嘅場面，講嘅係反對擴建將軍澳堆填區嘅區議員方國珊，佢被指喺8月為反堆填區非法籌款，23名跨黨派區議員搞咗個聯署譴責動議，今日會舉行閉門會議表決。


方國珊批評有份聯署嘅新民主同盟范國威都喺今年七一非法籌款，范國威還擊話自己當日有拎小販牌賣嘢籌款，仲話方國珊係打「烏賊策略」，想抹黑其他人金蟬脫殼。方國珊同Emily講，當時政府遲遲未發籌款牌畀佢，佢唯有做「預先推廣」，但唔係正式籌款。佢話今次西貢區議會召開特別會議傾一單「協助警方調查」、「未有結論」嘅個案，係開咗壞先例，借區議會名義公審，打擊政敵。范國威就話，《明報》喺8月22日嘅報道，已經有一張小朋友放錢落方國珊籌款錢箱嘅相，擺明係籌款。