灣仔書展賣名家簽名書

【明報專訊】提到灣仔「書展」，好多人都會諗起每年喺會議展覽中心舉辦嘅「香港書展」，其實灣仔區議會及香港書刊業商會，每年都會另搞一個「灣仔書展」。今年呢個書展喺灣仔修頓球場舉行，雖然地方無會展咁寬敞，但主辦單位仍然有方法突圍而出，就係推出限量「名家簽名本」，包括倪匡、卓韻芝、李碧華等，亦有「100蚊一袋書」。


設「100蚊一袋書」特價區

第九屆「灣仔書展」喺10月11至13日（周五至周日）舉行，書展期間，市民可以喺修頓球場入口處免費索取入場券，一共有38家出版社合共提供約10萬冊書，如果想掃書，不妨考慮「100蚊一袋書」特價區，喺特價區入口攞膠袋，就可以擠爆個袋，主辦單位話估計每袋可以放30幾本書喎！

每人限買兩本

「名家簽名本」就分兩批推出，第一批10月11日下晝5點開售，有倪匡《呼倫池的微波》、卓韻芝嘅《商業笑容》、李碧華嘅《烏鱧》等；第二批10月12日下晝3點開售，有蔡瀾《三妙也》同呂大樂《那似曾相識的七十年代》等；第三批則於13日下晝3點開售。大部分有50本，每個讀者限買兩本，全部售完即止。