沈旭暉擺烏龍

【明報專訊】中大社會科學院副教授沈旭暉平日除咗評論國際事務，亦都有玩facebook，喺佢自己個page談論國家大事，但沈教授同明報即時新聞一樣，都有「眼大睇過龍」嘅時候。


上載入境處網頁

沈教授噚日睇錯咗入境處個網頁，以為美國已經靜靜雞畀咗免簽證香港人，佢仲cap埋圖擺埋上自己個fb page。不過好快就有網民指正佢，話個網頁其實講緊美國人來港免簽證，沈教授亦都好快刪除咗個post。


明報即時新聞前日早上一樣犯咗手民之誤，把特首稍後「致辭」誤植為「辭職」。擺咗大烏龍，兩小時後更正及致歉。


講開簽證，美國駐港總領事館facebook就擺咗張通告，話美國政府雖然因為國會撥款爭議，需要局部停止運作，但領事館嘅簽證同提供畀美國國民嘅服務將會維持，不過其他服務會受限，仲話領事館期待服務恢復正常水平。咁究竟邊啲服務受限？領事館就無講。