阿牛嘆啟豐二號 「要驗到2047」

【明報專訊】保釣船「啟豐二號」仍未能通過海事處檢驗，保釣行動委員會成員曾健成（阿牛）話，噚日已經係海事處4個月來至少第三度上船檢驗，佢質疑海事處今次再有新發現，係雞蛋裏挑骨頭，拖延佢哋去釣魚島宣示主權咁話。阿牛話，如果海事處每次都驗屍咁驗，驗到2047年啟豐二號都未可以出海。


驗出4處不合格

海事處噚日驗嘅係啟豐二號密封廂，保釣行動委員會主席羅就話，今次驗出密封艙有4處不合格，包括船頭右邊破損、中間龍骨未駁好，另外噴氣喉發霉，船身部分玻璃纖維要換成鐵板。佢哋想用兩個星期做好維修，但因為籌款唔太理想，所以暫時仲係出海無期。


海事處回應話，噚日檢查後，發現有一項缺陷仍未更正，而因為船東早前已按海事處要求，完成清除船艙內氣體嘅工作，所以噚日係第一次入到船艙檢查，再發現3缺陷。