康文署App幫你「搵路行」

【明報專訊】10月起秋高氣爽，最適合做戶外運動keep fit，康文署近排出咗個「健步行」智能手機應用程式「Fitness Walking」，提供全港18區33條步行徑嘅路徑長度、行完整條路徑燃燒嘅卡路里等資料，仲可以用GPS系統幫用家搵附近嘅步行徑，非常方便，大家唔想運動又少咗個理由喇。


「健步行」係康文署近年推廣嘅運動，鼓勵市民喺1分鐘內完成50至100米速度步行嘅帶氧運動。而「健步行」App唔止係一個介紹步行徑嘅App，仲可以記錄個人步行數據作參考，包括行咗幾耐、行咗幾遠、步速等等。如果想知道當日運動成果，只要輸入出生年份、身高、體重等資料，就可以計到身體質量指數（BMI）、消耗熱量等數據做參考。