陳健民讚鄧家彪熟無家者

【明報專訊】佔中三子之一嘅陳健民教授，噚日出席「關注『無家者及拾荒者』人士」佔中商討日D-Day 2時，大讚一個建制派立法會議員對無家者同拾荒者有深入認識，仲笑住叫在場參加者可以考慮請教吓呢名議員。得到教授垂青嘅，原來係工聯會嘅鄧家彪。


唔講唔知，鄧家彪係陳健民嘅學生。陳教授喺中大教社會學，佢憶述鄧家彪嘅大學畢業論文係關於無家者嘅身體味道，佢話當年鄧家彪嘅論文內容，係講點樣以唔同味道分辨各種無家者。氣味最濃烈嗰啲係最難協助佢哋返回社會，剛剛開始有味道嘅無家者，係最好嘅切入時機幫助佢哋重返社會。另外，由於當年係1997年金融風暴之後，所以好多白領都成為無味道嘅無家者。


陳健民大讚鄧家彪嘅論文有趣，相信佢係深入走到無家者嘅圈子去認識佢哋。難得教授記得佢十幾年前嘅論文，唔知鄧家彪會唔會願意同大家分享同無家者相處之道？