劉迺強開班教基本法

【明報專訊】成立短短一年嘅愛港之聲，喺新蒲崗搵到佢哋嘅基地，設立新會所，噚日嘅開幕禮雖無官員或議員到場，但基本法委員會委員劉迺強就好畀面到賀，原來佢同主席高達斌係老戰友，多年前已相識於論政團體「匯點」咁話。高達斌話打算喺新會址開班教國民教育，培養愛國政治人才，劉迺強就好有義氣咁話可以幫手教《基本法》。


話培訓人才代欠佳政黨

除咗教國教，高達斌仲計劃開班教書畫，佢話希望藉此提升人嘅本性同內心世界。不過，講緊大計之時，高達斌轉話題批評「民咩黨」，話佢哋嘅議員唔係為港人整體利益做事，仲話無論係建制或泛民政黨，都視愛港之聲為競爭者。佢仲話，若果政黨表現欠佳，愛港之聲會培訓人才取而代之咁講。


淨心另搞「愛港行動」

另一邊廂，同樣係愛字頭嘅愛港力就有人事變遷，就係召集人陳淨心退出愛港力核心，佢發出新聞稿話，部分核心成員有嚴重排外心態，為咗遠離是非地，所以退出愛港力核心。不過，淨心BB嘅粉絲唔使擔心，因為佢已經成立咗「愛港行動」，作為團結愛國愛港網民嘅平台，繼續為愛國愛港目標前進。