學生通頂睇書

【明報專訊】年輕人睇書睇到瞌眼瞓就成日聽到，但今次係佢哋捱眼瞓都要通宵睇書，噚晚屏山天水圍圖書館聯同香港青年協會創新科學中心合辦「夜遊圖書館——科學與創意之旅」，77個來自天水圍同元朗嘅中四至中六學生，通宵留喺圖書館玩，一齊「通頂睇書」。


喺綠化平台觀星

成晚流流長，有咩玩㗎？除咗有睇書、科學知識嘅活動，仲可以喺圖書館綠化平台觀星。活動由噚晚9點到今朝7點半，參加者之一嘅周宇情同學，仲特登喺屋企冲完涼至過嚟，做足準備。佢話，平時喺學校做圖書館管理員，希望可以試吓夜闖圖書館。


康文署助理署長李玉文話，今次係圖書館服務50年嚟第一次搞通宵活動，希望可以令圖書館突破傳統框框，搞更多類型嘅活動。


話晒都留成晚，怕唔怕班年輕人瞓晒覺？香港青年協會督導主任呂慧蓮話，佢哋設計咗啲郁動多嘅活動，例如喺圖書館內跑嚟跑去玩定向，唔怕同學仔悶，仲可以畀大家喺平時好嚴肅嘅圖書館，試吓做啲咁好動嘅活動，打破圖書館一向保持安靜嘅規矩。