之鋒生日跌銀包

【明報專訊】因反國民教育科一役為港人認識嘅學民思潮召集人黃之鋒，噚日17歲生日，唔少人透過網路祝佢生日快樂，不過之鋒就喺facebook上載咗張對住電腦做嘢嘅相，話生日都係要做嘢，好彩前日學民成員已經同佢慶生。佢話生日願望好簡單，就係活得有意義同開心已經足夠。


生日要做嘢 學民提早慶生

不過，之鋒噚晚同屋企人去食飯，竟然喺巴士跌咗銀包，好彩佢遇到好市民，將銀包拎去差館，之鋒好快亦收到警察電話叫佢去拎銀包，去到差館要填個人資料，之鋒就「職業病」上身，問對方點解要拎咁多個人資料，點知警察叔叔同佢講﹕「放心喎黃生，家又唔係遊行示威，我哋家唔會刻意為難你㗎。」咁，唔通暗示遊行示威就會刻意為難？


學民思潮積極推動普選特首有公民提名，之鋒另一個願望，就話最好能成功爭取全民提名全民普選。