肥馬暗示恨抱孫

【明報專訊】前商務及經濟發展局長馬時亨（肥馬）任職投資銀行嘅孻女馬露玲（Andrea）日前出閣，一對新人上禮拜六喺教堂行禮後，噚晚喺四季酒店筵開33席宴請政商界朋友，差唔多全城高官、前高官、富豪等都畀面出席。而新翁肥馬同馬太嘅口水似乎由上周六流到噚晚都無停過，當有人問肥馬想唔想抱孫，佢就笑笑口暗示話﹕「曾生（曾蔭權）都講過（勸市民）生三個，所以佢哋知㗎喇。」


曾蔭權旅行無現身

前特首曾蔭權因為去咗旅行無現身，唔可以同肥馬一唱一和，但唔緊要，另外兩個新舊特首梁振英同董建華都有現身，再加埋各大地產商，包括恒地主席李兆基、長實副主席李澤鉅、新地聯席主席兼董事總經理郭炳江等等，搞到成個婚宴好似政商高峰會咁。


賓客粒粒皆星，自然吸引唔少傳媒到場，政治記者、經濟版記者同娛樂記者都聞風而至，肥馬當然識做，為行家送上西餅小食，仲特別抽時間同老婆、Andrea同女婿符傑廉（Ian）見吓傳媒，開咗個「小型」記者會。馬時亨話晚宴時一定唔會喊，仲話準備咗一個好風趣嘅演說同親友分享，希望佢哋有賓至如歸嘅感覺。


被問到慣唔慣被叫做符太時，Andrea笑到好甜咁話「結婚前（符傑廉）已經叫我做老婆」，符先生都有應記者要求輕吻符太臉頰。雖然肥馬暗示想抱孫，但Andrea都話爸爸媽媽都無畀壓力，想過吓二人世界先，生仔要等神安排。