鍾南山黃仁龍獲中大榮譽博士

【明報專訊】中大噚日宣布頒授榮譽博士畀5個社會傑出人士，其中「SARS英雄」之一、呼吸病學專家鍾南山會獲頒榮譽理學博士學位，表揚佢作為「抗非典第一功臣」同多年嚟對醫學界及教育界嘅貢獻。前律政司長黃仁龍就獲頒榮譽法學博士學位；至於東亞銀行主席李國寶同埋今年滿100歲嘅社會運動家杜葉錫恩，將齊齊獲頒社會科學博士學位。


儀式後日舉行

除咗鍾南山，諾貝爾醫學獎得主Barry James Marshall同樣獲中大頒授榮譽理學博士。適逢今年中大50周年校慶，榮譽博士頒授儀式會喺後日（17日）校慶日大會上舉行，同場仲會頒發第一屆卓敏講座教授席，畀11個表現卓越嘅中大學者，大學仲會喺未來5年設專款支持佢哋研究。