百大名望城市 港排54

【明報專訊】有人認為名望如浮雲，但聲譽顧問公司（Reputation Institute）就覺得名望可以吸引外資、遊客同人才，所以非常重要，於是1999年起搞百大名望城市調查，香港今年全球排54，比上年66位升12級，喺亞太區排第5；世界冠軍就由澳洲悉尼奪得。


升12級 叻過台北上海

呢個排名係聲譽顧問今年1至2月訪問8大工業國（G8）2.2萬巿民，對100個特選城市嘅觀感而定。頭5名依次係悉尼、加拿大嘅多倫多、瑞典嘅斯德哥爾摩、奧地利嘅維也納同意大利嘅威尼斯。亞太區方面，最受歡迎嘅城市依次為大阪、東京、新加坡、峇里島同香港。雖然香港全世界排名得54，比起第69嘅台北同第75嘅上海為高。


聲譽顧問仲對比各大城市同其所屬國家嘅聲望指數差距，以100分為滿分，香港有61.4分。