阿涂憂有人用雙非避BSD

【明報專訊】立法會負責審議買家印花稅（BSD）嘅條例草案委員會，早前討論買家如果以受託人或監護人身分幫未成年人士買樓，可以唔使畀15%印花稅。委員之一嘅民主黨涂謹申早前同Emily詳細解釋呢個漏洞，話好擔心有非本地人會利用雙非嬰或本地嬰，借故將佢哋列做「受益人」，「送層樓畀佢哋」，就可以避開BSD，仲話自己個仔涂信之都分分鐘會被人利用。


阿涂話呢個方法基本上零風險，除非個細路滿咗18歲，發現自己被利用，或者佢父母發現，要接管番層樓，如果唔係，個非本地買家可以一直以「受託人」身分託管單位，幾年後獲利賣出，離開埋香港，已經追究唔到；同樣漏洞連「精神上無行為能力人士」都可以利用。阿涂話，寫呢條條文原意就係唔想歧視細路仔同殘疾者，但就變咗好大個漏洞，政府都諗唔到點搞。運房局發言人話留意到議員意見，會詳細考慮。