傅振中論反佔中 觀眾夠包容

【明報專訊】反佔中嘅愛港之聲前成員傅振中噚日下午無去政總撐政府，一支公去咗天主教一個政制研討會，同香港教區榮休主教陳日君樞機、民主黨李柱銘同佔中發起人之一陳健民論佔中。傅振中拎住一張天主教佔中商討日嘅宣傳單張，質疑單張誤導，指單張「點解唔叫『佔中商討日』，反而叫『天主教商討日』，點解要隱瞞佔中？」佢嘅出現不但無畀人噓，反而畀人讚。


50多名市民出席研討會，大家除咗聽3個嘉賓分享，仲上咗一堂民主實踐課。因為當傅振中提出質疑，並舉例埃及民主去證明民主制度有不足時，佢講足5分鐘都無觀眾出聲反駁，大家好安靜聽佢嘅意見。主持人就話「民主正正就係要包容唔同嘅聲音」，仲話好多謝傅振中嘅出現令大家可以學習，傅振中立即起身鞠躬。


陳日君：教徒佔中無送聖體服務

有天主教徒問陳日君，如果佔中嗰日撞正星期日，返唔到教堂領聖體，教區會唔會有送聖體服務畀佔中嘅教徒。樞機就話領聖體係嚴肅神聖嘅事，所以唔會冒險送聖體，但佢都安撫信眾話「上主有好多方法給我哋恩寵」，仲話「上帝在心中」。