龍鳳奇珍 周五起中大展出

【明報專訊】傳說中嘅「鳳凰」大家聽得多，鳳係雄鳥、凰係雌鳥，原來有隻鳳鳥靜雞雞匿喺中大好多年，佢喺邊呢？Emily細心睇，原來佢匿埋喺校徽入面。Emily打聽到，中大藉住50周年校慶，今個星期五（25日）至明年3月2日，喺中大文物館舉辦「地下的中國——鳳翥龍翔」展覽，講述華南地區8000年前鳳鳥嘅起源故事。


展出商代皇后玉器

展覽將展出20幾件鳳鳥文物及6件玉龍，當中包括商代皇后婦好嘅一啲玉器，係國家一級同二級文物嚟，仲有從未展示過嘅鳳鳥白陶。


呢個展覽有咁多珍品，皆因係中大同中國社會科學院考古研究所、湖南省及深圳市文物機構合辦。展館每日朝十晚五免費開放畀公眾參觀，市民可致電3943 7371查詢，仲可以用50蚊買本圖文並茂嘅《鳳翥龍翔》深入了解鳳鳥。但10月24日、31日及公眾假期間，展覽會暫停。