「sexy得嚟有structure」唐唐借評酒讚妻

【明報專訊】前政務司長唐英年係好酒之人，佢噚日應邀出席一個紅酒分享會，唔止借紅酒大讚老婆郭妤淺「sexy得嚟又有structure」，又讚自己當年撤銷紅酒稅係一個「諗通諗透」嘅政策，令紅酒文化更普及。佢仲自爆有一次「飲白蘭地，結果差啲返唔到屋企」。


唐唐噚日講到自己對波爾多左右岸紅酒睇法時，就話覺得右岸出產嘅紅酒「sexy」啲，易入口，所以較容易吸引人；而左岸出產嘅就比較有「structure」，硬淨啲，所以唔係一飲就識欣賞。當記者朋友問唐唐「你太太係右岸定左岸？」唐唐就笑住答「佢係mixture（混合）」，引得哄堂大笑。


自誇撤紅酒稅「諗通諗透」

主持人一講起紅酒稅，唐唐就憑酒寄語政府「推一個政策，要諗通諗透，而且成效可以喺兩三年內見到」，之後就話佢當年提出撤銷紅酒稅，唔止令酒文化更豐富，仲可以令紅酒更普及。


唐唐又自爆20幾年前去過一個法國酒莊，被莊主挑戰，考佢同佢啲朋友一支酒嘅年份，結果唐唐估中咗，所以唔單止可以品嘗到好多靚酒，仲可以歎白蘭地，結果飲到醉醉哋，幾乎走唔到。