恒大小股東排隊食點心

【明報專訊】噚日恒大搞臨時股東大會（EGM），一大堆記者朋友聞風而至，不過現場只見CFO謝惠華，其他管理層就唔見人，謝惠華喺股東會完咗亦都好快閃人，未有接受傳媒訪問。最終現場只剩下一大堆股東排隊歎茶食點心。


今年以來內地樓市非常活躍，恒大近期賣樓成績都非常唔錯，頭9個月合約銷售保住上升勢頭，按年升27％，要完成全年賣樓目標無難度。不過有老友就笑言，恒大昨招待股東嘅茶點略為慳家，過往十分闊佬咁放晒各款點心任股東自取，今次就要股東排長龍（圖），按人頭每款限攞兩件點心。


不過小琴就認為，話晒租場搞EGM，再加埋各款酒水絕不便宜，始終都喺公司錢，可以幫股東慳番一筆都喺好事。