蘇錦樑想記者少「叫囂」

【明報專訊】噚日喺會展舉行嘅香港東盟經貿合作論壇，除咗有10個東盟國家部長訪港參與，出席者仲包括近排忙於處理免費電視牌照風波嘅商務及經濟發展局長蘇錦樑（Greg So），佢係自從萬人遊行集會後首次現身公開場合，自然成為傳媒重點追問對象。不過，喺論壇開始前記者相繼問佢會唔會公開發牌文件時，局長都無回應，直至中場休息時有記者再次大聲提問，佢突然行埋嚟批評記者「你應該尊重其他人」。局長咁樣做，唔通想學本月初APEC會議時嘅印尼官員，想阻止記者提問？局長其後解釋，佢想大家唔好大聲問問題，係想場內嘅外國賓客可以「賓至如歸」，所以想減少「叫囂」，仲話港府官員對「較尖銳嘅問題」係絕對唔會迴避回答。


噚日同場嘅兩個Greg都成為追問對象，另一個就係菲律賓貿易與工業部長多明戈（Gregory L. Domingo），記者都想佢回應港政黨就人質事件提議經濟制裁菲律賓事件。