生命熱線出動死神鬧市籌款

【明報專訊】下周又到萬聖節，嘩鬼會出動，大家如果見到「死神」唔使驚，因為死神今次唔係嚟攞命，而係嚟籌款嘅。生命熱線喺萬聖節期間舉辦「死神休假企劃」，本周六到下周四（星期日除外），有超過300名義工會著住死神套裝同面罩，喺銅鑼灣及中環10個地點籌款，包括銅鑼灣行人專用區、中環7號碼頭等。


籲珍惜生命 讓死神放假

今次嘅善款將用於生命熱線青少年生命教育項目，教青少年處理負面情緒同援助身邊有自殺傾向嘅人。生命熱線一直提供預防自殺服務，今次突破地扮死神籌款，生命熱線高級經理吳志崑話，其實想藉此吸引青少年注意。佢希望香港人學識珍惜生命，到時死神就可以放假，離開香港去旅行。