改圖諷政府立會 搞岸電鬥卸膊

【明報專訊】啟德郵輪碼頭啟用幾個月，但遲遲未見政府落實「岸電」（岸上供電系統），環團擔心遲啲有大量郵輪泊岸，會加劇空氣污染，於是寫咗封信畀立法會經濟事務委員會主席田北俊，要求將岸電問題納入議程，逼政府做嘢，唔好懶懶閒。


地球之友同健康空氣行動用心良苦，透過二次創作方式，改圖揶揄立法會同政府互相推搪，例如上年度環境事務委員會主席何秀蘭，以碼頭由商經局管理為理由，將問題轉交當時嘅經濟事務委員會主席林健鋒處理。為免環境局同商經局又你推我讓，環團要求兩個委員會舉行聯席會議，釐清責任，盡快將啟德打造成綠色港口，等市民享用碼頭公園嘅時候，唔使吸入郵輪噴出嘅廢氣。