TVB周刊送雞粉

【明報專訊】最近被網民惡搞兼嘲諷嘅無綫（TVB）飲食節目《May姐有請》，播咗半年之後噚晚終於「大結局」喇，一連27集May姐不停喺節目哈哈哈哈大笑，又繼續落雞汁煮鮑魚，嚟到噚晚最後一集，笑聲好似收斂咗，但節目結束後May姐話希望再同大家見面，仲特別以哈哈哈哈笑聲作結。


網民戲稱拍《May姐再請》

唔知係咪TVB特別鍾意啲雞味調味品呢，今期主打宣傳新劇《On Call 36小時》嘅TVB周刊，就送贈一罐「鮮味雞粉」，不過牌子唔係史雲生，而係李錦記，唔知TVB係咪想順便向雞汁節目致意呢？

Emily噚日見啲網民話，一諗到以後星期日唔使再睇雞汁同聽May姐笑聲撈飯食，都不禁歡呼，有網民話耳根清靜，亦有網民講笑話，TVB可能真係會拍番集《May姐再請》。May姐節目好唔好睇真係見仁見智，亦有觀眾覺得輕鬆睇吓飲食節目無妨吖，唔使咁認真嘅。


《吾淑吾食》接力

May姐告別，TVB繼續搞飲食節目，之後安排咗由黃淑儀主持嘅《吾淑吾食》緊接播出，節目同樣有植入式廣告；而且TVB早前仲話唔排除添食，再拍多輯《May姐有請》，但要視乎May姐檔期喎。