黃鴨屁股指揮泳手

【明報專訊】公益金踏入45周年，伙拍會德豐辦「百萬泳」籌款活動，噚日係淺水灣搞渡海泳，參加者大清早去到泳灘，就見到兩隻「縮水版」黃鴨正喺海上暢泳！原來大會別出心裁，用黃鴨做賽道標示，泳手游到去鴨屁股，就知道要轉彎。


噚日天氣有啲涼，參加「領袖邀請賽」嘅立法會議員梁繼昌就話水溫只有21℃左右，落水都有啲震，但有別於早前參加維港渡海泳，今次容易得多，一來上次要游1500米，今次只係400米，二來今次人少又浪靜，所以游得好舒服。而喺領袖邀請賽組別，自由黨議員鍾國斌好勁，8分17秒奪冠，會德豐主席吳光正阿仔吳宗權就以8分20秒得亞軍，梁繼昌就第四名。


吳光正父子檔奪亞

今次活動有會德豐牽頭，吳光正父子同埋一眾公司高層都支持，吳氏父子檔一齊落水，二人游得又睇得，仲喺「兩代接力賽」中攞到亞軍。呢次活動有230人參加，為公益金籌到400萬元。