「南瓜頭」盈盈 樂樂冧晒

【明報專訊】就快萬聖節，海洋公園每年都搞「哈囉喂」，除市民入去畀鬼嚇，其實海洋公園動物都同大家一齊慶祝萬聖節！海洋公園搵美國來港南瓜雕刻大師，整件禮物送畀大熊貓樂樂，佢唔係用南瓜整成熊貓最愛竹，而係雕個熊貓女盈盈個樣南瓜頭送畀樂樂（圖1），唔怪得樂樂對住南瓜愛不釋手。

潛水員亦同水族館內魚一齊哈囉喂，潛水員著住骷髏骨裝束，用大南瓜裝滿魚糧落水餵哺逾5000條魚（圖2），魚當然唔會畀骷髏骨嚇親，反而追住人搵食。