拒婚族投資 蝕錢容易啲

【明報專訊】唔想結婚，投資就會損手？富達國際投資訪問咗557個月薪介乎1.8萬至4萬元、年齡介乎30至49歲嘅單身人士，發現無結婚打算嘅受訪者當中，51％過去一年投資輸錢；有結婚打算人士輸錢比例最低，得38％；對婚姻持開放態度（not sure）的人就有42％人輸錢。


調查：逾半近一年損手

小琴好奇何解不婚主義者投資特別容易損手？富達個人投資業務區域總監李錦榮就話，調查問到受訪者點評價自己投資知識，原來不婚主義者中只得14％人覺得自己「好識投資」，係三個類別中最低。對比仍想結婚者嘅比例達28％，唔肯定會否結婚嘅都有20％。加上不婚主義者投資取向最為保守，對市况轉變又唔夠敏感，可能出現「高追低沽」情况，唔怪得之要蝕錢啦。


管理層太自信 易輸錢

另外，按收入及職級去統計，任職公司最高決策層嘅單身人士，月入平均4.3萬蚊，人工雖然最高，但投資表現麻麻，過去12個月有46％人要蝕錢，25％人仲蝕超過一成。投資成績反而比不上另一批月入約2.6萬蚊嘅中層管理人員或者部門主管，佢地只有兩成人蝕錢、即有八成人都有錢賺，而且45％人嘅投資回報更跑贏恒指。據講因為最高嘅老細級別忙於管理公司，又過分相信自己，無向專業人士請教投資所以容易蝕錢。


調查仲有個得意發現，問到點樣確保有舒適嘅退休生活，絕大部分人都話透過儲多啲錢或者投資多啲，但亦有成17％受訪者話希望透過同比自己更有錢嘅人結婚來增加財富。


email: piano@mingpao.com