郵筒攝影賽 網上普選贏相機

【明報專訊】殖民年代留下嘅郵筒係香港文化遺產，香港郵政話，啱啱喺10月中完成9個古老郵筒修復工作，呢批古董係現存最古老或最具特色嘅郵筒，其中8個喺喬治五世（1910至1936年）及喬治六世（1936至1952年）在位期間鑄造，餘下一個係唯一一個使用中嘅橢圓形郵筒，喺伊利沙伯二世在位期間鑄造，豎立喺皇后像廣場。


香港郵政話，為提高市民對保育古老郵筒意識，由今日至11月27日舉辦攝影比賽，參加者可以提交有關9個古董郵箱嘅沙龍相，香港郵政會將最佳10幅作品上載facebook畀網民「普選」，獲最多「讚」嘅照片，拍攝者將贏得佳能S100相機一部。


同時，香港郵政仲諗到財路，推出最新「郵趣廊」紀念品——古郵筒限量版珍藏模型。呢啲Q版郵箱合共發行400套，價錢唔平，每套售1088元。想知多啲古老郵箱同比賽資料，可瀏覽http://www.hongkongpost.hk。