孕味無晒 盈盈食詐糊

【明報專訊】8歲大熊貓盈盈樂樂過去兩年努力「造熊貓」，盈盈上月底終於出現懷孕迹象，全城期待有第一隻港產熊貓BB出世，可惜，海洋公園同佢做咗多次超聲波掃描、採集血液同小便樣本之後，噚日證實盈盈無大肚，真係空歡喜一場。但海洋公園叫大家唔使擔心，因為大熊貓到20幾歲都仲可以生BB，佢哋頭幾年交配成功懷孕機會只得三至五成，家盈盈仲好後生，工作人員會幫盈盈樂樂交配做「賽後檢討」，期望佢哋出年可以誕下愛情結晶品。


盈盈仲後生 大把機會

盈盈樂樂今年7月出現發情期，海洋公園關閉熊貓館畀機會佢哋交配，又試行人工受孕。盈盈上月中終於有「孕味」，包括食慾大減同瞓多咗覺，仲有外陰腫脹、荷爾蒙水平出現變化現象，公園一度以為盈盈有咗BB。


回復活躍 荷爾蒙基準水平

不過公園獸醫和護理團隊發現，盈盈呢幾日活躍番晒、胃口回復正常，荷爾蒙都返回基準水平，懷孕迹象減少，終於證實盈盈「食詐糊」。


懷孕迹象明顯 證發育成熟

臥龍中國保護大熊貓研究中心獸醫主管王承東話，睇番數據之後，確定盈盈成功懷孕嘅機會非常低。但佢話盈盈今年懷孕迹象比舊年明顯，證明佢身體發育成熟，成功懷孕機會愈來愈高。