蘇牧師道歉收回言論

【明報專訊】中國基督教播道會恩福堂主任蘇穎智牧師喺今年6月30日「屬靈領袖訓練與教會前途」講道中，講到中大崇基神學容許非信徒入讀，擔心會令學生離開信仰，呢番言論激起一班崇基學院神學院學生及校友發聲明回應，並獲超過200人聯署響應。蘇穎智噚日發聲明道歉，並承諾收回言論。


曾稱非信徒入讀令人擔憂

恩福堂噚日上載咗一封蘇穎智致歉聲明，蘇牧師話對自己言論為崇基師生帶來傷害深感不安，並決定收回言論。佢又話，當日講道只係想講解現時神學院起碼有兩種運作模式，不同模式各有利弊，只希望神學院可堅守聖經、繼續有效為教會培育牧者同領袖，澄清並無意圖對任何人造成傷害，又早於師生聲明刊登前，已向崇基神學院院長盧龍光致歉並解釋，同時託對方向師生轉達歉意。


網頁抽起講道錄音檔

蘇牧師收回言論，Emily就發現恩福堂網頁幾日前亦將當日嘅講道錄音檔抽起，名副其實將蘇牧師嘅言論收番，好彩蘇牧師呢份聲明將會喺11月3日，喺基督教報章《時代論壇》以廣告形式刊登，立此存照。