CY約定食飯 財爺走唔甩

【明報專訊】話說自經濟發展委員會成員喺首次開會後於政府總部canteen食過一餐飯後，特首梁振英（CY）以為同委員有默契喺開會後會直落食飯，點知上次開會後委員各有各忙，連財政司長曾俊華都無咗回事，帶咗住家飯，請咗CY「食檸檬」，搞到最後得幾個「梁粉」陪CY撐枱腳。噚日經發會再開會，據講今次CY一早send定電郵約委員會成員喺開會後飯局。


雖然經常有傳CY同財爺貌合神離，不過CY今次隆重其事以電郵邀請大家，仲將地點由政總canteen「升呢」到去禮賓府開咗兩枱，財爺亦無帶住家飯，開會後直落同CY食飯，緊接再同CY行孖咇，見埋立法會議員做施政報告諮詢，結果佢哋兩個由朝早見到黃昏，行咗大半日孖咇