德銀翠華 冰釋前嫌

【明報專訊】香港唯一一間茶餐廳股翠華（1314）同佢嘅上市獨家保薦人德銀，似乎終於冰釋前嫌。德銀噚日出咗份報告，大讚翠華今年積極開分店，對佢哋內地業務擴張更具信心，仲預測公司明年上半年盈利會增長近四成。評級由「沽售」上調至「持有」，目標價亦由3.3元調高42%至4.7元。


睇番翠華去年11月上市之後，德銀嘅態度可以用「變臉」去形容，上市冇耐就將評級由最初「買入」降到去「沽售」，咁快畀保薦人降級情况罕見，大家估可能佢哋之間有啲不愉快經歷。不過從德銀呢份新報告話，視察完翠華內地業務之後釋除疑慮，睇嚟應該係翠華積極同佢重修舊好嘅成果。