啟豐二號試航成功

【明報專訊】幾經波折，保釣船「啟豐二號」噚日終於成功試航，緊打算遠航去三沙捉魚！話說噚日保釣行動委員會主席羅就同委員古思堯開船出航，點知朝早10點臨出發前，海事處職員突然上船，用個半鐘檢查消防同救生設備，最後只得由筲箕灣駛去尖沙嘴先同傳媒見面，再用個幾鐘試航去南丫島，過程幾順利。

重裝雷達 先去捉魚

羅就話，條船之前雷達壞，家已裝新雷達，機房都整番，打算月初出海遠航三沙同南沙捉魚，航程大概800浬。

至於仲會唔會去釣魚島，羅就話「啟豐二號係漁船，理論上可以自由出境，個地球係圓」，唔排除去其他地方，到有正式計劃再同大家講喎。

夢熊：政府始亂 終棄維基

「啟豐二號」泊文化中心時，Emily見到「尖啤」劉夢熊探班。本身係保釣行動委員會顧問夢熊話，噚日係特登去支持大家。講起港視不獲發牌，佢拋下一句，話政府對王維基「始亂之，終棄之」，一開始有高官邀請佢做電視台，王維基「係最努力個」，到頭來唔發牌，而且唔解釋原因，係「與民為敵」。