各行各業BB 宣揚廉潔

【明報專訊】今年風波多多的廉署（ICAC），原來眨吓眼喺明年2月已屆40周年。廉署藉40歲生日將推出新一套嘅廣告宣傳打擊貪污的信息，繼早前用咗「雞蛋高牆」概念作廣告主旨，以示保護核心價值嘅重要性後，今次廉署廣告有多達10幾個BB，希望透過呢批廉署BB展示活力同朝氣，傳達要喺廉潔及公平嘅環境下，作為未來社會主人翁嘅BB先可以喺未來發展潛能及所長。


新一輯長30秒嘅電視廣告，巿民從今日起就可以睇到，廉署高級傳媒宣傳創作主任陳敏儀話，拍攝時佢哋只要求眾BB做番自己，鍾意喊又得，瞓覺又得，佢哋會為拍到嘅動作特寫配上潛在職業，例如踢腳就係足球員，希望表達每人都有無限潛能，但BB們要發揮所長，就要有廉潔同公平嘅環境先得。


對於如何力挽前專員湯顯明涉失當行為嘅形象傷害，該署社關處助理處長何渭枝就強調，設計廣告時唔會考慮個別事件。


除了廣告，廉署為40歲生日有一系列活動，遲啲仲會推出手機App，又會搞開放日、微電影節等等。