美聯太子女出嫁 梁愛詩證婚

【明報專訊】美聯物業（1200）太子女兼公司副主席黃靜怡，上個禮拜六啱啱響淺水灣酒店舉辦婚禮，禮拜二就已經返工，處理好公司業務，等過多一排先去度蜜月，果然事業心重兼有女強人本色也。


小琴噚日同黃靜怡飯局，恭喜佢之餘，當然有講起佢夫婿，原來佢哋係香港大學讀財務及金融嘅同班同學，經過多年愛情長跑先拉埋天窗。小琴一再打探，得知大小姐的丈夫姓楊，現時喺私募基金度做，係位年輕金融才俊，再睇睇相，楊生和楊太，確係一雙璧人。


嫁妝係豪宅同古董名表

講返上個禮拜六美聯太子女的婚禮，原來請咗家族友好、前律政司長梁愛詩做證婚人，自然面子十足。太子女當日所着嘅婚紗亦有名堂，係出自著名設計師Noel Chu（朱潔麗）手筆；Noel曾經幫賭王何鴻燊孫女何家華、羅氏針織家族羅可旋，以及九巴家族古嘉敏等名人設計嫁衣，可以話係富豪「御用」婚紗設計師。小琴多口問大小姐出嫁，做爸爸嘅美聯主席黃建業有乜嫁妝相贈呢？原來係「大大嚿磚頭」，即係豪宅一間，至於黃夫人就送咗一隻古董名表，相信恨死唔少姊妹。


email: piano@mingpao.com