Ann姐建議佐敦「開房」

【明報專訊】日前有報道話港人嘅性活動空間不足，民建聯立法會議員蔣麗芸就建議大家，可以去佐敦道一帶嘅賓館「開房」喎。


噚日Ann姐請一眾記者食飯，大家席上討論前日政府公布嘅人口政策諮詢文件，仲互相切磋吓可以點樣鼓勵生育。有記者就話，香港人連製造BB嘅空間都無，Ann姐建議，等到屋企嘅老人家行開，咁就有空間，之後就笑住話唔得嘅話就去「開房」。佢仲話九龍塘理想酒店執笠，可以考慮去佐敦道嘅賓館，「賓館多到不得了」。


Ann姐話，家構思一個「嬰兒基金」，建議政府為每個新生嬰兒設立一個户口，儲起爸爸媽媽、姨媽姑姐嘅利市錢，連埋政府資助，就可以減輕父母嘅壓力咁話。