林鄭碌架牀做功課唔自卑

【明報專訊】政務司長林鄭月娥噚日出席青協活動，同青年對談人口政策。大家最關心脫貧問題，不過睇嚟時下年輕人對前景感到好灰，因為300多個出席嘅同學都無人同意讀大學可助脫貧，連林鄭都慨嘆「時代變啦」，佢話家要喺經濟轉型方面多下工夫，為年輕人提供多元化工種。同學又不斷質疑政府嘅扶貧措施好表面，甚至係「垃圾」，更有同學問林鄭「你有無試過窮嘅滋味？」


被質疑「有無窮過？」

噚日有26間中學，共300多名同學出席對談會。林鄭話喺30年前，大學畢業後就係一條大直路。家時代變，要發展多元化經濟，提供多元化工種，甚至係可以打入大陸市場嘅工，仲強調「大家唔好灰心，要爭取機會裝備自己，個人增值好重要」。


同學仔話讀大學無助脫貧

除咗貧窮問題，大家都好關心司長個位係咪「坐得定」， 林鄭就話挑戰一浪接一浪，但佢個位「坐得暖」、「坐得定」。


此外，有同學向司長獻計，建議為中小學生提供兩蚊乘車優惠。不過林鄭就潑冷水，話家已經有車船津貼，而且公共資源有限，措施應該聚焦喺最有需要人士身上。


林鄭噚日亦再分享早排佢喺港台講過嘅童年故事，話自己細個都係住唐樓，喺碌架牀做功課，不過都無感到自卑，因為當時好多小朋友嘅環境都係咁。佢強調政府未來嘅扶貧工作會針對幫助在職貧窮同綜援家庭嘅小朋友。