Google主席訪中大迷路

【明報專訊】Google執行主席Eric Schmidt訪問香港，噚日朝早出席中文大學活動，佢遲咗半粒鐘先嚟到，道歉之餘，Eric仲話，如果司機有用佢哋公司嘅產品Google Map嘅話，就可以準時到達活動地點，原來中大校園實在太大，搞到司機大佬行錯路。活動地點喺大學站隔籬，但佢哋就由中大正門入咗校園，兜咗一大圈，要靠電話求救先揾到目的地，唔怪得連中大校長沈祖堯都話，Eric參加咗一次「安排之外」嘅校園遊覽。


沈校長：當遊覽校園

Eric雖然係「Google三巨頭」之一、全球首富排第135名，但為人就相當隨和親切，噚日同幾個香港本地年輕創業者傾偈，全程笑容滿面，有問必答，又話自己好享受同創業者傾偈，因為佢哋係「香港未來嘅億萬富翁」，仲提醒全場出席者要好好尊重年輕創業者，夠晒幽默。