葉劉萬元新裙爆鏈

【明報專訊】上周六政界有唔少喜事，令一眾達官貴人要走幾場，其中新民黨主席葉劉淑儀當日亦唔例外，但當日佢發生咗件勁尷尬嘅事，搞到要返屋企換衫。事緣當晚佢著咗條喺連卡佛買、價值超過一萬蚊嘅連身裙，出席民建聯葉國謙娶新抱嘅飲宴。點知喺酒會期間，呢條第一次著嘅靚裙，喺腋下嘅拉鏈突然爆開，搞到佢十分尷尬，唯有用手拉實條裙衝入洗手間，等佢個女Cynthia拯救。


Cynthia立即為媽咪張羅，包括去酒店內嘅商舖買裙，專做旗袍嘅上海灘就好唔話得，免費借出其中一套，可惜唔啱身，最終葉太要用酒店嘅大頭針將條裙暫且扣實，立即「走後門」離開場地，搭車返屋企換衫，先至可以去另一場飲宴。


葉太噚日話，條裙要成萬蚊，仲寫明係法國製造，點知第一次著就爛，所以翌日佢立即拎去連卡佛投訴，要求整番好條裙。