董建華閃電現身猛獁牙雕展

【明報專訊】噚日有個猛獁牙（即係史前長毛象嘅象牙）雕藝術展喺會展開幕，係由全國政協教科文衛體委員會辦公室「指導」舉辦。主辦單位喺採訪通知中話，會有好多香港同中央領導人同名人出席，吸引近百名記者到場。結果全國政協副主席、前特首董建華「旋風式」到場，逗留唔夠5分鐘就走咗。在場近百名記者「鬧爆」負責人係咪誤導記者，負責人回應話，佢哋只係將邀請貴賓嘅名單寫喺採訪邀請上，咁樣做係內地習慣，指事件係「中港文化差異」導致誤會咁話。


名人未見 「中港文化差異」

採訪通知話，董建華、前政務司長唐英年、全國人大常委范徐麗泰、李澤楷同霍郭晶晶，仲有一名神秘嘅國家級領導人出席開幕禮。港聞版、中國版、經濟版同娛樂版嘅記者都好期待可以一次過見到一班猛人，但最終只有董先生現身。無緣採訪各界猛人，但就有機會見識長毛象牙製成嘅牙雕。展覽喺灣仔會展舉行，展期到明天，早上10時至下午5時免費入場。