自製模型巴士迷「玩」出前途

【明報專訊】要做真正巴士迷，除咗追最新型號同追巴士影相之外，仲可以去學整模型，分分鐘「玩」出前途！Emily噚日去咗由九巴舉辦嘅模型巴士比賽，除咗有人分享「玩」巴士心得，仲有好多高手識整模型，其中22歲嘅朱民軒就試過用成過萬蚊同大半年時間，親手製造「熱狗」模型巴士。


阿軒話，4年前開始迷上遙控巴士，經常學點樣製作，加上佢就讀專業教育學院電子工程學系，可以將課堂知識學以致用，由最初邊上網邊搵資料，到家編寫電子程式、設計電動閘門同路線牌，令模型愈整愈逼真。佢話，每次平均要用成100小時先可以整到一部模型巴士，佢已經製作咗超過30部1﹕13嘅遙控模型巴士，即差唔多有成1米長。


阿軒嘅作品得到本地收藏家賞識，更獲外國買家追捧，曾有外國買家出價3200美元（約2.5萬港元）訂購。佢話好開心有人欣賞佢嘅作品，雖然父母唔太支持變成事業，但佢會堅持，因為唔想香港只有金融地產等行業。