林鄭好感動

【明報專訊】噚日星期日，政務司長林鄭月娥亦馬不停蹄，連走3場出席唔同嘅公開活動，其中一場去到西區中山紀念公園，睇一班小學生跳「校園活力操」，林鄭睇得十分投入，拍晒手打拍子，不過就無跳埋一份。


體育門戶網成立

精英運動員協會推出「動感校園」計劃，屬於「家是香港」活動之一，噚日喺黃金寶、葉姵延等精英運動員帶領下，近千個小學生一齊跳活力操拍MV，又宣布成立體育門戶網站（http://www.hongkongsport.org）。林鄭一身便裝出席活動，同大班人一齊拍MV，又舉起網站嘅牌做宣傳，佢睇住學生跳活力操時都顯得好投入，而身旁嘅精英運動員亦跳埋一份，不過黃金寶就跳得唔係好合拍喇。


林鄭致辭時話，可以見證同學做活力操，令佢覺得感動，又話雖然精英運動員協會無豐富資源，但喺學校熱心支持下都做到好成績，又大讚運動員以前喺運動場上為港爭光，退役後亦不忘服務大眾。