樹根嫌魔童錢少叫收皮

【明報專訊】人稱「Tree gun」嘅民建聯議員鍾樹根又爆「精彩」言論，話說噚日立法會資訊科技及廣播事務委員會討論香港電台興建新大樓，造價涉及60億元，Tree gun發言時就藉機挖苦不獲發牌嘅「魔童」港視主席王維基，話搞個新電視台infrastructure（基建）要60億，王維基「得嗰幾廿億身家，真係、真係要收皮」。佢仲乘機問廣播處長鄧忍光做乜唔早講（大樓造價要60億），等佢上個禮拜可以用埋呢個資料，作為武器去「砌」動議用特權法查發牌事件嘅莫乃光喎。


想用60億作武器砌莫乃光

Tree Gun「收皮」論搞到議員個個「O晒嘴」，連委員會主席黃毓民都忍唔住開口叫佢重返正題，仲話佢爆出「鍾樹根叫王維基收皮」嘅「sound bite」，今日實見報。


同場嘅毛孟靜都畀Tree Gun搞到好嬲，不過佢話自己係斯文人，唔會喺議會講啲咁粗鄙嘅嘢囉。


長毛「道歉」：梁振英衰過鄧忍光

噚日會議仲上演一幕長毛（梁國雄）向鄧忍光「道歉」事件，長毛話之前曾經鬧佢無誠信，原來係怪錯咗佢，因為有人比佢更衰，嗰個就係梁振英。長毛「道歉」時充滿感情，成班議員就忍唔住笑，Emily見到鄧忍光都笑笑口，莫非佢都認同長毛所講？