搶國泰50蚊機票 網民空歡喜

【明報專訊】為慶祝國泰fanfare機票優惠網站成立1年，國泰噚日劃一以50蚊破底價出售來往紐約、米蘭等11個目的地嘅機票，吸引大批人一早起身搶飛，最高峰時有7萬網民「排隊買飛」。但有人就喺網上埋怨網絡不斷出現error（錯誤），根本買唔到飛，國泰就話網站出現技術問題，向受影響客人道歉。


揀晒時間入埋資料 畀錢有error

話說噚日只得2000張特價飛，網站早上8點鐘一開波已經吸引咗1.8萬人登入，但有份搶飛嘅Emily同其他網民一樣，喺fanfare生日慶典得個「㷫」字，揀晒時間、輸入埋資料，去到畀錢嗰刻突然有error，結果一場空歡喜。


國泰話本來已經預咗位處理急增流量，仲實施流量管制措施，將唔係訂緊飛嘅僱客分流入等候區。但國泰話系統朝早「間歇性受不可預見的技術問題影響」，搞到部分客人訂票最後階段先確認唔到機位，家正就此同技術供應商調查事件。