梁錦松：要忍自由行

【明報專訊】近月不時有人批評內地自由行旅客嚟香港走水貨、瘋狂購物「搶資源」嘅行徑好比「蝗蟲」，當年有份簽署CEPA（兩地更緊密經貿關係安排）嘅前財政司長梁錦松噚日就話，唔覺得要檢討一簽多行，不過就要諗吓點樣先可以吸引高質素遊客。阿松話，明白港人對部分自由行旅客嘅行為唔係好睇得過眼，但認為絕大部分自由行都無咁嘅問題，仲話為咗經濟發展要容忍下喎！


阿松話，家好似無人記得2003年SARS爆發後，香港變咗死城，仲話如果當時無中國大陸，香港唔會係今日嘅香港，仲叫大家記得「兩制」嘅同時，都唔可以忘記「一國」。佢又建議喺廣東成立自貿區以吸納香港人才，令內地同香港可以受惠。


要陪仔女 「唔係會飛走」

娶咗伏明霞嘅阿松話，佢家經常要出外做嘢，大半年都唔喺香港，所以對於近日行會同免費電視牌照風波都唔太清楚，封口拒評。佢又講笑打比喻，話上得珠穆朗瑪峰多，都要落山返去大本營，見吓老婆仔女，佢仲話自己3個小朋友仲喺成長階段，如果唔陪多啲佢哋，到時仔女有毛有翼就飛走㗎喇！