青協大獎 唐明治鄧蓮如出錢出力

【明報專訊】青年協會首屆「香港青年服務大獎」噚日舉行頒獎典禮，以表揚願意為香港奉獻、身體力行服務香港嘅青年，雖然唔係乜嘢大獎，但嘉賓冠蓋雲集，連1980年代擔任律政司嘅唐明治，同佢太太、時任行政立法兩局首席非官守議員鄧蓮如女男爵，都特登由英國飛返香港出席，十分畀面。


封口拒評港政局

青協總幹事王䓪鳴就特別多謝唐明治夫婦為今次活動出錢出力，原來鄧蓮如係今次活動主要贊助人之一，其他包括行會前成員夏佳理、貿發局主席蘇澤光等。不過鄧蓮如都好低調，無論問點睇家香港政局，定佢對活動捐咗幾多錢，佢都唔肯回應。


唔止鄧蓮如，出席活動嘅嘉賓都全部封口，好似夏佳理被記者追問點睇行會召集人林煥光嘅言論等，佢都唔回應；前商務及經濟發展局長馬時亨聽到林煥光個名，就向記者講「三個字﹕不予置評」。